Heimilt er að nota almenn gervigreindartól sem aðstoð við eftirfarandi verkþætti enda samræmist notkunin þessum viðmiðum:

• Hugmyndavinnu og greiningu

• Kóðun

• Prófanir (t.d einingaprófanir, samþættingaprófanir, e2e prófanir, álags- og frammistöðuprófanir og öryggisprófanir)

• Hönnun og arkitektúr

• Verkefnastjórnun og skjölun

• Efnisvinnslu

Aðilar sem hyggjast nýta gervigreind í aðra verkþætti en skilgreindir eru hér skulu óska eftir heimild til þess hjá Stafrænu Íslandi. Dæmi um slíka verkþætti eru t.d.

• Innleiðing innbyggðrar gervigreindar sem hluta af afurð verkefnis

• Tengingar ytri gervigreindar (e. AI agents) við kerfi Stafræns Íslands

Gervigreindartól sem nýtt eru skulu uppfylla kröfur um gæði og öryggi í samræmi við gæðastefnu og upplýsingaöryggisstefnur Stafræns Íslands.

Leiki vafi á heimild til notkunar gervigreindar með hliðsjón af viðmiðum þessum eða af öryggis- eða siðferðislegum sjónarmiðum skal leita samþykkis hjá Stafrænu Íslandi.

Óheimilt er að setja eftirfarandi upplýsingar inn í opin eða ytri gervigreindartól:

• Viðkvæmar persónuupplýsingar eins og þær eru skilgreindar í lögum um persónuvernd.

• Gögn úr þróunarumhverfum (s.s. API-lyklar (e. API keys), stillingarbreytur (e. config variables), leynigögn (e. secrets, atvikaskrár (e. logs) o.s.frv.)

• Trúnaðarupplýsingar eða óútgefið efni

• Upplýsingar úr þjónustukerfum eða málaskrám

• Allar aðrar upplýsingar sem talist geta innihaldið persónulegar upplýsingar (PII)

Sérstaklega er óheimilt að afrita raunveruleg notendagögn, kennitölur, beiðnir eða kóða sem inniheldur raunverulegar tengingar við kerfi við villuleit, þjónustu eða greiningu.

Heimilt er að nota tilbúin gervigögn að því gefnu að ekki sé hægt að rekja þau til raunverulegra einstaklinga eða mála.

Stafrænt Ísland getur óskað eftir frekari upplýsingum um notkun gervigreindar á samningstíma s.s.:

• Hvort og með hvaða hætti gervigreind verði notuð

• Í hvaða tilgangi

• Hvernig ávinningur er metinn

• Hvernig gæðaeftirlit og rýni fer fram

Notkun gervigreindar breytir ekki ábyrgð.

• Þróunaraðili ber fulla ábyrgð á gæðum, öryggi og réttri virkni afurðar.

• Allur kóði og efni sem unnið er með aðstoð gervigreindar skal fara í hefðbundna rýni (e. code review) hjá ábyrgðaraðila kóða áður en það fer í útgáfu.

• Ábyrgðaraðili kóða ber ábyrgð á yfirferð og samþykkt breytinga, þar með talið breytinga sem unnar eru með aðstoð gervigreindar. Sjá Ábyrgðaraðilar kóða (e. Code owners)

• Breytingarbeiðni (e. pull request) á kóða skal ávallt vera lögð fram af manneskju ekki gervigreind.

• Ef gervigreind hefur verið nýtt er æskilegt að það komi fram í breytingarbeiðni (e. Pull request) t.d. með merkingu eða í lýsingu

Gervigreindartól skulu ekki notuð sem staðgengill fyrir faglega dómgreind eða öryggismat.

Notkun gervigreindar skal ávallt vera í samræmi við:

• Persónuverndarlög

• Upplýsingaöryggisstefnu Stafræns Íslands

• Viðeigandi verksamninga

• Öryggisflokkun gagna ríkisins

• Gervigreind hjá hinu opinbera

• Aðrar samningsbundnar kröfur
  

Notkun gervigreindartóla við vinnu í verkefnum fyrir Stafrænt Ísland er á ábyrgð þróunaraðila og telst hluti af almennum rekstrarkostnaði hans.

Stafrænt Ísland ber ekki kostnað vegna áskrifta eða annarra gjalda sem tengjast notkun gervigreindartóla við hugbúnaðarsmíði, nema sérstaklega hafi verið samið um annað fyrir fram.

Ekki er því hægt að gera sérstaka kröfu um greiðslu vegna notkunar gervigreindar í þróun, prófun, greiningu eða annarri vinnu sem tengist verkefnum Stafræns Íslands.